11

[previous] [next] [index]

Furi et Aureli comites Catulli.
siue in extremos penetrabit Indos
litus ut longe resonante Eoa
tunditur unda.
siue in Hyrcanos Arabesue molles 5
seu Sacas sagittiferosue Parthos
siue quae septemgeminus colorat
aequora Nilus.
siue trans altas gradietur Alpes
Caesaris uisens monumenta magni 10
Gallicum Rhenum horribilesque ulti
mosque Britannos.
omnia haec quaecumque feret uoluntas
caelitum temptare simul parati.
pauca nuntiate meae puellae 15
non bona dicta.
cum suis uiuat ualeatque moechis
quos simul complexa tenet trecentos
nullum amans uere sed identidem omnium
ilia rumpens. 20
nec meum respectet ut ante amorem.
qui illius culpa cecidit uelut prati
ultimi flos praetereunte postquam
tactus aratro est.

[previous] [next] [index]

last modified on 5/5/95.
The Obscure Organization supports experimentation in the arts and technology.

If you have questions or comments, please contact:

Richard Bullington-McGuire <rbulling@obscure.org>